Набрзо по вработувањето согледав дека ми се потребни повеќе алатки за решавање на проблемите кај луѓето. Не бев задоволна од просечноста, сакав да знам како можам подобро да им помогнам на луѓето. Не сакав да прифатам дека во некоја ситуација нема решение, односно знаев дека мора да може уште нешто да се направи. Тој порив за постигнување на подобри резултати во третманите ме принуди многу пати да се откажам од многу работи во мојот живот, да вложам енергија, пари и време и да патувам во странство за да ги завршам најпознатите техники од физиотерапија што не беа достапни во нашата земја ( и сеуште не се), за да знам да им помогнам подобро на луѓето.
Стекнав многу знаење што имав можност да го употребувам секојдневно во мојата работа и набрзо можев да видам големи резултати, голем успех кај луѓето коишто ги третирав. Во мојата 33 годишна пракса на физиотерапевт им помогнав на илјадници луѓе да ги решат своите проблеми и да дојдат до својата цел.
Покрај знаењето, искуството и големиот успех во справувањето со проблемите на моите клиенти, јас сè почесто можев да приметам дека медицината не е секогаш моќна во решавање на болките и болестите и состојбите на луѓето. Медицината се фокусира на решавањето на симптомите и го набљудува самостојно проблематичниот дел, а не како дел од целината.  
Кога се соочив со сериозен здравствен проблем – имав парализа на стопалото, за мене не беше доволно да се концентрирам на лекувањето на стопалото, сакав да знам која е причината што стои позади тој мој проблем.

За да се справам со мојот здравствен проблем се посветив на учење на алтернативни древни техники со коишто успеав за неколку месеци да го излечам моето стопало и фокусот да го префрлам на енергетско-суптилното тело каде што всушност лежат сите причини за проблемите кои се појавуваат на физичкото тело.
Тоа искуство ме збогати како човек, го збогати моето искуство како терапевт и ми овозможи да им помагам на луѓето на многу подлабок начин. Од целото мое знаење и искуство создадов своја Холистичка програма со која решавањето на физичките и емотивни проблеми кај луѓето е длабоко трансформативно и целосно.
Техниките со кои работам делуваат на ментално, емотивно, физичко и спиритуално ниво. Покрај работа на симптомите на физичкото тело, паралелно работам и на пронаоѓање на причината за проблемот што се наоѓа на некој дел од суптилно-енергетското тело, бидејќи само со пронаоѓање на причината за постоење на проблемот може да се создадат услови за целосно исцелување, оздравување и ослободување од проблемот.